Эрхэм зорилго

 Компанийн үндсэн зорилт нь хөдөө аж ахуйн салбарыг дэмжих, дэмжлэгийн нэр төрөл, хүртээмжийг нэмэгдүүлэх, өрсөлдөх чадварыг хөгжүүлэх ажил, үйлчилгээг зохион байгуулахад оршино.

Үйл ажиллагаа

“Хөдөө аж ахуйн корпораци” ТӨХХК нь Засгийн газрын 2021 оны 12 дугаар сарын 22-ны өдрийн 394 дугаар тогтоолоор байгуулагдсан ба 2023 оны 7 дугаар сарын 7-ны өдөр Хөдөө аж ахуйг дэмжих сан татан буугдсан тул тус сангийн бүтэц, хүний нөөц, үйл ажиллагаа, салбар агуулах, эд хөрөнгийг бүрэн шилжүүлэн авч үйл ажиллагаагаа эхлүүлэн ажиллаж байна. Хөдөө аж ахуйн корпораци нь Монгол Улсын газар тариалангийн салбарыг хөгжүүлэх зорилгоор үр тариа хадгалах, нөөцлөх, улсын нөөц бүрдүүлэх, тариалан эрхлэгчдэд бүх төрлийн таримлын үр, бордоо, ургамал хамгааллын бодис, шатахуун, техник, тоног төхөөрөмжийг дотоодын зах зээл болон импортоор худалдан авч хөнгөлөлттэй үнээр болон зээлээр олгож зээлийн эргэн төлөлтийг тариаланчдын үйлдвэрлэсэн бүтээгдэхүүнээр эргэн төлүүлж, зах зээлд борлуулж ажилладаг төрийн өмчит хязгаарлагдмал хариуцлагатай компани юм. 
 

Туршлага

    Бид жилд 2600-5400 тариаланч иргэн, аж ахуйн нэгжид 32-55 тэрбум төгрөгийн хөдөө аж ахуйн бараа бүтээгдэхүүн худалдан борлуулж ажилладаг ба түүхэн хугацаандаа 35 нэр төрлийн бүтээгдэхүүн давхардсан тоогоор 34,5 мянган харилцагчид 640 тэрбум төгрөгийн борлуулалт хийсэн байна.
Олон улсын төсөл хөтөлбөр хэрэгжүүлсэн туршлага:

• ОХУ-ын Гадаад эдийн засгийн банкны хөнгөлөлттэй зээлийн санхүүжилтээр 2017 онд 10.0 сая ам.доллар, 2018 онд 8 сая еврогийн өртөг бүхий ОХУ-д үйлдвэрлэсэн үр тарианы комбайн, трактор, хадлангийн иж бүрдэл техникүүдийг тариаланчдад нийлүүлэх “Монгол Улсын хөдөө аж ахуйн техникийн паркийг шинэчлэх хөтөлбөр”-ийн I болон II дугаар үе шатыг хэрэгжүүлэн ажиллаж байна.
• БНХАУ-ын Засгийн газрын хөнгөлөлттэй зээлийн санхүүжилтээр 40.0 сая ам.долларын өртөг бүхий 8000 ширхэг малчдад зориулсан бага оврын тракторыг борлуулах төслийг 2013-2018 онд хэрэгжүүлсэн бол 24.5 сая ам.долларын өртөг бүхий үр тарианы усалгааны систем, трактор, техник, хадлангийн иж бүрдэл нийлүүлэх төслийг 2017 оноос хэрэгжүүлж байна. 
• БНБУ-ын Засгийн газрын экспортын зээлийн санхүүжилтээр 4,5 сая еврогийн өртөг бүхий трактор, хүнсний ногооны иж бүрдэл техник, хадлангийн иж бүрдэл техник нийлүүлэх төслүүдийг 2021 оноос эхлүүлэн амжилттай хэрэгжүүлж байна.